Sa fuji u tempu, non mi par'auvèru,

 non z'importa ca scorz'i vita

mòrunu all'umbra da memoria.

Ricordi vecchj nchjànanu,

 ma doppu sprufùndanu

 comu derfini nta nu mar'i nchjòstru,

 mentr'i penzeri mei ciangiunu

ammènz'a rruggia ill'anima

e i coragli russi com'u sangu.

Na lucicèglia ca du fundu veni

m'ì mmostra n'appress'all'attru

e non mi dannu scampu:

N'amuri servaggiu chjinu i cotraranza,

jornati nfocati a fraja i mari,

carizzi c'u cori nduciùti

sutta l'umbra da cerasàra

e po' a sira, quandu nu suli vrigognùsu

si ngiaciav'e pedi nostri

aspettandu nu bas'i mari e sali

ca cunzumava i labbra

e l'anim'abbrusciava.

I viju ancora chill'occhj virdi

ca nchjanàvanu nto celu

e i radicat'ill'anima treman'ancora,

comu fantasmi cumpàrunu nto scuru

mentr'èu a poc'a vota mi stutu

 ...nta stu mar'i nchjostru.